Markazlashgan Respublika Ta'minot Bazasi

10:43 | 24 May 2016

TATUda dasturlash bo‘yicha olimpiada bo‘lib o‘tdi

016-yilning 20—21-may kunlari Toshkent axborot texnologiyalari universitetida  “Toshkent axborot texnologiyalari universiteti, uning hududiy filiallari va Toshkent shahridagi Inha universitetlari birinchi bosqich talabalari o‘rtasida dasturlash bo‘yicha jamoaviy olimpiada” bo‘lib o‘tdi. Bu haqda Toshkent axborot texnologiyalari universiteti matbuot xizmati “Daryo”ga xabar berdi.

Ushbu musobaqa mamlakatda ta’lim-tarbiya jarayonida talabalarning faolligini oshirish va ularning intellektual salohiyatini rivojlantirish, iqtidorli yoshlarni rag‘batlantirishga qaratilgan vazifalarni bajarilishini ta’minlash maqsadida uchinchi bor tashkil etildi.

Saralash natijalariga ko‘ra ikkinchi, final bosqichida Toshkent shahrining 13, Samarqand filialining  besh, Urganch filialining ikki, Farg‘ona filialining uch va Toshkent shahridagi Inha universitetining bitta jamoasi qatnashdi.

Birinchi o‘rinni TATUning Tashkent U of IT 2 jamoasi, ikkinchi pog‘onani Tashkent U of IT 1 jamoasi egalladi. Uchinchi o‘rin Inha universiteti jamoasiga nasib etdi.

10:40 |

O‘zbekiston Prezidenti Islom Karimov Xitoy tashqi ishlar vazirini qabul qildi

O‘zbekiston Respublikasi Prezidenti Islom Karimov 23-may kuni Oqsaroyda mamlakatga rasmiy tashrif bilan kelgan Xitoy Xalq Respublikasi tashqi ishlar vaziri Van Ini qabul qildi. Bu haqda Daryo.uz  xabar berdi.

Davlat rahbari mehmonni samimiy qutlar ekan, O‘zbekiston mamlakatlar o‘rtasida barcha yo‘nalishlardagi barqaror va ishonchli hamkorlikni yuksak qadrlashini ta’kidladi.

O‘zbekiston va Xitoy o‘rtasidagi uzoq muddatli manfaatlarga asoslangan strategik sheriklik munosabatlarining ustuvor yo‘nalishlari va istiqbolini belgilashda muntazamlik kasb etgan oliy darajadagi muloqotlar alohida ahamiyatga ega.

Uchrashuvda Xitoy Xalq Respublikasi Raisi Si Szinpinning O‘zbekistonga bo‘lajak davlat tashrifi o‘zaro munosabatlarni yanada rivojlantirishda muhim bosqich bo‘lishi ta’kidlandi.

O‘zbekiston va Xitoy o‘zaro manfaatli va samarali hamkorlik bo‘yicha katta tajriba to‘plagan. 2015-yilda ikki mamlakat o‘rtasidagi o‘zaro tovar ayirboshlash hajmi 4,1 milliard AQSh dollarini tashkil etdi. O‘zbekiston iqtisodiyotiga jalb qilingan Xitoy investitsiyasi hajmi 6,5 milliard dollardan oshdi. O‘zbekistonda Xitoy kapitali ishtirokida tashkil etilgan 651 korxona faoliyat ko‘rsatmoqda, bir qancha muhim qo‘shma loyihalar amalga oshirilgan.

Ikki mamlakat ishbilarmonlari “Angren” maxsus industrial zonasida shina va konveyer lentalari ishlab chiqarish zavodini, “Navoiyazot” aksiyadorlik jamiyati bazasida polivinilxlorid, kaustik soda va metanol ishlab chiqarish kompleksini barpo etish va boshqa yirik loyihalarni hayotga tatbiq etmoqda.

O‘zbekiston bilan Xitoy o‘rtasida ko‘p asrlik tarixiy rishtalarga asoslangan ta’lim, ilm-fan, texnologiyalar, tibbiyot va madaniyat sohalaridagi hamkorlik izchil rivojlanmoqda.

Uchrashuvda O‘zbekistonning Shanxay hamkorlik tashkilotiga raisligi doirasida bo‘lib o‘tadigan tadbirlarda Xitoyning ishtiroki va O‘zbekiston – Xitoy hamkorligiga doir boshqa masalalar yuzasidan fikr almashildi.

ShHTning kuzatuvchi davlatlar va xalqaro tashkilotlar rahbarlari ishtirokida Toshkentda bo‘lib o‘tadigan sammiti muhim siyosiy voqea bo‘lib, sammit davomida tashkilotning turli sohalardagi faoliyatini yanada takomillashtirish va samaradorligini oshirishga qaratilgan muhim qarorlar qabul qilinishi ta’kidlandi.

Mehmon O‘zbekiston Prezidentiga samimiy qabul va o‘zaro hamkorlikning dolzarb masalalari, tomonlarni qiziqtirgan mintaqaviy va xalqaro muammolarni atroflicha muhokama etish imkoniyati yaratilgani uchun minnatdorlik bildirdi.

10:35 |

Bojxona qo‘mitasi Yagona portalda yangi xizmatni yo‘lga qo‘ydi

O‘zbekiston Respublikasi davlat bojxona qo‘mitasi Yagona interaktiv davlat xizmatlari portalida yangi xizmatni yo‘lga qo‘ydi. Bu haqda “daryo.uz” xabar bermoqda.

Ushbu xizmat yordamida tadbirkorlik subyektlari — yuridik va jismoniy shaxslar mahsulotlarni davlat foydasiga voz kechish bojxona tartibiga o‘tkazishga ruxsat berilishi yoki buning rad etilishi haqida sanasi hamda raqami ko‘rsatilgan bildiruv olishi mumkin.

Xizmat 15 kalendar kuni mobaynida bepul ko‘rsatiladi.

15:34 | 12 May 2016

Milliy bankda Jahon bozorlari, investitsiyalar va texnologiyalarni tahlil qilish markazi tashkil etiladi

O‘zbekiston Respublikasi Tashqi iqtisodiy faoliyat milliy bankida Jahon bozorlari, investitsiyalar va texnologiyalarni tahlil qilish markazi tashkil etiladi, deya xabar bermoqda “Daryo.uz” Vazirlar Mahkamasi qarori (pdf)ga tayanib.

Markaz jahon bozorlarini chuqur tahlil qilib, rivojlangan mamlakatlarning ilg‘or texnologiyalarini o‘rganadi va shu asosda mahalliy iqtisodiyot aniq tarmoqlarining investitsiya faoliyati bo‘yicha mufassal tavsiyalar ishlab chiqadi, shuningdek, investitsiya loyihalarini shakllantirishda iqtisodiy va texnologik baholashlarni samarali tashkil etadi.

Markaz, shuningdek, xorijiy banklar bilan sheriklik munosabatlarini mustahkamlash, yirik investitsiya loyihalarini  moliyalashtirish uchun kreditlar va qarzlarni jalb etish yuzasidan hamkorlikni faollashtirish, yangi texnologiyalar sohasida hisobotlar va sharhlarni, shuningdek, respublika iqtisodiyoti tarmoqlari tomonidan ko‘rib chiqish uchun takliflar tayyorlash, har haftalik jahon va mahalliy moliya indekslarini hamda tarmoqlar va korxonalar bo‘yicha boshqa iqtisodiy ko‘rsatkichlarni sharhlash bilan shug‘ullanadi.

Markaz Muvofiqlashtirish guruhi bilan kelishgan holda O‘zmilliybank Boshqaruvi raisi tomonidan lavozimiga tayinlanadigan va lavozimidan ozod etiladigan direktor tomonidan boshqariladi.

15:31 |

O‘zbekistonning eksport salohiyati: joriy holati va istiqbollari

Mamlakatning eksport salohiyatini kuchaytirish dasturi doirasida 18-may kuni Toshkentda o‘zida interaktiv muzokaralarni aks ettirgan yangi formatdagi tadbir “Tovar va mahsulotlar eksporti” mavzusidagi amaliy biznes-anjuman o‘tkaziladi.

Mazkur tadbir mamlakatning turli hududlarida tekstil, qishloq xo‘jaligi, kimyo, oziq-ovqat, farmatsevtika, shuningdek, xizmat ko‘rsatish sohalarida band bo‘lgan ko‘plab ishtirokchilarni jalb qilishi ko‘zda tutilgan.

O‘zbekiston juda yuqori eksport quvvatiga ega. Biroq buni amalga oshirish uchun korxonalarning raqobatbardoshligini oshirishga, boshqa davlatlarga taklif kiritish uchun o‘zlarining ishonchli hamkor sifatidagi o‘rinlariga ega bo‘lishlariga yo‘l ochishdek oqilona yondashuv lozim bo‘ladi. 18-may kuni o‘tkazilishi kutilayotgan “Tovar va mahsulotlar eksporti” biznes – konferensiyasi yuqorida aytib o‘tilgan masalalarni hal qilish va O‘zbekiston tadbirkorlarini tashqi savdo bozorlarida raqobatbardosh bo‘la olishdek kerakli bilimlar bilan qurollantirish maqsadida tashkil etilmoqda. Tadbir nazariy va amaliy qismlardan iborat.

Tadbirning nazariy qismi o‘z ichiga tadbirga taklif etilgan uch nafar o‘zining keng amaliy malakasiga ega bo‘lgan muvaffaqiyatli eksport strategiyasini o‘rnatgan spikerlar – Dmitriy Dichkovskiy, “Yorqin yechimlar” marketing agentligi asoschisi Igor Kachalov va eksport bozorlari bo‘yicha avstriyalik mutaxassis Maksimilian Foyedingerlarning chiqishini o‘z ichiga olgan.

Amaliy qismda panelli muhokama o‘tkazilib, O‘zbekistonda xalqaro malakalarni qo‘llash variantlari va imkoniyatlari maqsad qilingan, shuningdek, shu kabi masalalar ham muhokama qilinadi.

Tadbir joriy yilning 18-may kuni Wyndham Tashkent mehmonxonasida o‘tkaziladi. Tadbir tashkilotchisi Be The Change Group kompaniyasi bo‘lib, hamkorlik qiluvchi tashkilotchi AMBiT (Xalqaro biznes assotsiatsiyasi), bosh tematik hamkor China Leasing Group’lardir.

“Daryo” ushbu tadbirning axborot hamkori hisoblanadi